周一(18日)凌晨德甲，拜仁慕尼黑主场3比0大破史特加，英格兰前锋哈利卡尼又入2球，今季只系踢14轮就入20球，打破德甲史上最快入20球纪录。由於「1哥」利华古逊主场3比0赢法兰克福，少踢1场嘅拜仁慕尼黑继续落後4分排第2位。

拜仁慕尼黑今仗有好开始，哈利卡尼开波唔够2分钟就射入空门，打破近3仗入球荒，55分钟再喺角球攻势近门顶成2比0；拜仁63分钟另一次角球攻势又得手，南韩中坚金玟哉顶入佢加盟後第1个入球，协助拜仁慕尼黑大胜3比0。

哈利卡尼14轮已经入20球，打破德甲史上最快轰入20球纪录，旧纪录保持者系西德名将施勒，佢喺63/64球季为汉堡入30球，但要到第21轮赛事先入到20球，哈利卡尼今次一口气将纪录推前7轮！呢位英格兰前锋赛後表示：「我好似好耐冇入过波，老实讲今仗系拜仁今季最佳比赛，我哋甚至可以入多几球，好开心我嘅入球帮到球队赢波。」