周六(16日)英超出现惊心一幕，卢顿作客般尼茅夫嘅赛事踢到59分钟，卢顿队长洛克尔突然心脏病发昏迷倒地，救护员即场为佢急救，球证亦宣布比赛腰斩。洛克尔被送医院检查後，卢顿发声明指洛克尔喺离场嗰阵已恢复意识，依家会留院进行详细检查。

卢顿今仗3分钟由伊利查艾迪巴约入波领先，般尼茅夫58分钟由苏兰基追平，但之後洛克尔喺中圈冇任何碰撞下突然倒地，双方球员即叫救护员入场，卢顿主帅艾华斯亦示意球员让路，两队之後返更衣室。据报洛克尔当时曾经昏迷，球证随後决定比赛腰斩。

卢顿赛後发声明表示：「军医证实洛克尔比赛期间心脏病发，好在喺担架床抬走嗰阵已经有反应，佢喺球场内接受进一步治疗，好多谢两支球队嘅军医，洛克尔已被送入院，佢依家情况稳定，并喺屋企人陪伴下进行更多嘅检查。」

29岁嘅洛克耶系威尔斯国脚，今次唔系佢第1次「出事」，今年5月嘅英冠升班附加赛决赛，洛克尔亦曾经喺比赛入面晕倒，喺7月份进行心脏手术後获准重返球场。英超赛後未决赛腰斩赛事点处理，最大机会系另择日期踢埋余下比赛时间。