据德国《图片报》报道，拜仁慕尼黑同明年约满嘅汤马士梅拿达成续约协议，将会续约1年至2025年6月，意味呢位传奇前锋将至少奉献25年光阴畀呢间德甲豪门。

34岁嘅汤马士梅拿今季失去主力位置，虽然各项赛事上阵18场，但只有7场系担任正选，更多时间成为「通天佬官」或「後备杀手」，有传汤马士梅拿亦萌生去意，包括曼联在内嘅豪门都有意签佢，不过经教练杜曹挽留下，《图片报》证明双方已达成续约1年协议，预料下星期会正式官宣。

杜曹日前表示汤马士梅拿仍然系重要一员：「梅拿好努力，佢知道球队需要啲乜，而且可以胜任前场4个位置，梅拿绝对有资格成为正选。」据报汤马士梅拿续约，王牌前锋哈利卡尼最开心，事关呢位英格兰国脚登陆德甲後，同汤马士梅拿、利莱辛尼已成为老友。

汤马士梅拿2000年加入拜仁慕尼黑青年军，08年开始展开一队生涯，为球队上阵接近700场，入球超过200球，绝对系拜仁慕尼黑嘅Icon。