曼联前锋今季入球偏低，高价签入嘅丹麦箭头海伦，登录英超头14场联赛都未入波，令人谂起上季1月借用嘅荷兰前锋韦格贺斯，佢喺曼联半季17场联赛0球，同样饱受批评。韦格贺斯最近表示，佢喺曼联之所以陷入球荒，最大问题系领队坦哈格嘅战术安排！

今季喺贺芬咸入咗4球嘅韦格贺斯向《每日镜报》表示：「借用曼联嘅日子其实好成功，球队好少输波，我系曼联嘅主力，作为中场同前锋嘅连系人物，唯一缺少嘅只有入球。喺德甲或土超，我一直系球队最前线目标人物，队友以我为重心，但喺曼联我嘅任务系令身边嘅人发挥，我觉得自己做得好好，不过无论喺边个角度睇，我都希望自己有更多入波。」

最近有数据指出，曼联两翼安东尼马菲奥斯同阿历真度加拿祖，甚少传波畀中锋海伦，令呢位丹麦小将极少埋门机会，如果唔想海伦变成「新韦格贺斯」，坦哈格嘅战术安排真系要调节一下。