阿士东维拉今季异军突起，依家喺联赛榜同阿仙奴、利物浦鼎足而立，被视为有力争标份子，不过曼联名宿加利尼维利日前预言，维拉「公式化踢法」即将爆煲，莫讲话要争英超冠军，就连入前4名都要靠奇迹。

加利尼维利表示：「维拉需要踢得更聪明，愈嚟愈多球队会对住佢哋死守，艾美利要搵到更具创造力嘅踢法去破密集，佢哋依家打法非常公式化，面对组织严密嘅球队好难撕破防线。我觉得维拉系支好球队，如果最後拎到第5名会系非常好嘅成绩，入前4就要奇迹，我认为维拉喺最後一个欧联席位嘅争逐会慢慢落後。」

维拉今季以反击凌厉见称，月初曾经连赢曼城同阿仙奴2大劲旅，但上轮对住降班区嘅锡菲联就老鼠拉龟，要去到补时7分钟先靠尼高路辛尼奥路入波1比1逼和对手。