同迪基亚一样「失业」大半年嘅前曼联中场连格，近日收到好消息，根据英国《每日邮报》爆料，爱华顿打算向呢位31岁英格兰国脚开出半年短期合约，希望佢协助球队打护级战，连格或者可以趁机证明实力，拯救足球事业。

爱华顿因为财政违规，今季英超被扣10分，现时仅领先尾四卢顿1分，兼踢多对方1场，随时可能跌入降班区，加上球会陷入财困，无力收购球员提升实力，惟有向自由身球员埋手，包括睇中连格，毕竟佢曾於英超打滚多年，并且不乏佳作，「拖肥糖」领队戴治认为签入连格，有助球队抢分，但考虑到呢场中场始终已有半年冇比赛，会方只愿意开出半年短约，直至今季结束为止。

连格上年夏天约满离开诺定咸森林，一度去韦斯咸跟操6星期，但不获留用，其後转赴沙特阿拉伯，去到由谢拉特执教嘅伊蒂法克跟操，一样冇得留低，如果今次可以获得爱华顿开出合约，即使系短约，相信连格应该都会接受。