意甲球队罗马换帅之後，成绩有改善，但球会财政问题仍然严峻，为咗节省开支，今季结束之後，将会放弃两位高薪名牌前锋保罗戴巴拿、卢卡古，球队前景唔乐观。

罗马2022年签入自由身嘅保罗戴巴拿，上年夏天向车路士借用卢卡古，虽然两单交易都免转会费，但两人年薪合共1,500万欧元(约1.26亿港元)，对於陷入财困嘅罗马，造成沉重负担。

意大利传媒指，罗马就算取得下届欧联入场券，都唔会续借卢卡古，同时亦会出售保罗戴巴拿。根据保罗戴巴拿嘅合约，由7月1日至31日进入「特价时段」，其他联赛球会可以用1,200万欧元买断佢，呢位30岁阿根廷国脚今季为罗马上阵21场入9球及6次助攻，功架十足，罗马要搵买家应该唔难。

另外，盛传沙特阿拉伯公共投资基金计划以9亿欧元(约75亿港元)收购罗马，如果成事，呢间老牌球会就可以解决财困，届时保罗戴巴拿、卢卡古或者可以唔使走。