车路士领队堪称球坛最恶做工作，无论前班主阿布拉莫域，抑或现时老板保利都对於炒领队绝不手软，坐上「车仔」帅位往往朝不保夕，今年更加出现一幕「奇景」，自从2011年安察洛堤离队後，执教过车路士嘅10位着名领队，不约而同现时都冇嘢捞或者即将失去饭碗，包括落实将於今夏离开拜仁慕尼黑嘅杜曹，呢10位仁兄就好似患上「炒车创伤後遗症」，活喺阴霾之下，现任领队普捷天奴额头应该滴紧汗。

摩佬帮罗马捧盃仍不敌魔咒

摩连奴2004年带领波图赢得欧联冠军後，同年夏天转教车路士，同当时嘅俄罗斯班主阿布拉莫域，开创咗球会嘅一个新时代。当年英超几乎由曼联同阿仙奴垄断，摩连奴一上任就先喺2月赢得英联盃，跟住再协助车路士成功赢得球会50年来首个顶级联赛锦标，之後传出同阿布唔妥，於合约最後一年嘅2007年9月离队，但「寸王」已成为球会最成功领队，执教3季赢得6个锦标。

「寸王」离开史丹福桥後，执教国际米兰及皇家马德里都赢联赛冠军，但始绐逃不过「摩3季」魔咒，教唔过3年就离队。称霸完意甲同西甲，摩连奴重返车路士，同首次上任一样，赢得英超及英联盃「双冠王」，但一直未能帮车路士赢到欧联，最後於2015年离任。

喺第2次离开车路士後，摩连奴继续喺英超打滚，执教曼联及热刺，协助「红魔鬼」於2016/17年球季连夺社区盾、英联盃同欧霸，但去到热刺颗粒无收，系接近20年首次执教球会冇锦标落袋，一度被谑笑「回塘」。不过摩连奴其後执教罗马，就用成绩证明自己，2021/22年球季执教「雌狼」首季，就赢得欧协联冠军，终结球季长达11年锦标荒。可惜呢名葡萄牙狂人始终不改高傲性格，多次暗示球队唔肯加大投资，因而触怒高层导致决裂，於今年1月合约仲有半季前被炒。现时摩连奴皇帝女唔忧嫁，多间球会都对佢有兴趣，但唔少人猜测，葡萄牙国家队领队一位，先至系佢最想做嘅工作。

干地大闹记招冇人敢再用

干地喺意甲及意大利取得成功，於2016年完成欧国盃後，由意大利国家队「转跑道」，顶替希丁克执教车路士。干地喺车路士最成功之处，系上任无耐喺成绩唔掂之下，果断弃用球队惯用嘅「433」，转打三中坚嘅「343」，之後即刻取得英超13连胜，追平阿仙奴纪录，更史无前例，成为英超史上首位连续3个月获得每月最佳领队嘅教头。

车路士喺干地上任後首季，即刻赢得英超冠军，之後一季亦高举英足盃，但由於佢之後处理迪亚高哥斯达被指冷血无情，再加上喺转会买卖方面同高层不和，以及同正选球员关系欠佳，最终喺2017/18年球季，「车仔」只得联赛第5，未能取得欧联资格下被炒鱿。

干地离开车路士1年後重返意大利球坛，同国际米兰签约3年，虽然喺2021年帮球会重夺意甲冠军，但唔够1个月干地就自己宣布辞职。辗转下2021年11月，佢接替被炒嘅纽奴做热刺领队，上任首季即协助球队反弹，以第4名完成球季，取得欧联资格。不过好景不常，干地不耻热刺嘅经营手法，喺2023年一场联赛，被当时榜尾嘅修咸顿逼和後，於记者会爆seed，用咗足足4分30秒批评球会，直斥球员自私、球会文化、高层不思进取，根本冇争胜心，结果佢求仁得仁，喺不足10日後被炒。

现时干地抖咗成年仍然未有嘢捞，热刺个记者会相信吓怕唔少班主，近一、两年唔少豪门炒完教练，都冇乜传过有球会想搵干地。

返意大利都搞唔掂沙利连环食无情鸡

意大利名帅沙利2018年夏天加盟车路士，成为球队史上第1位创出英超开季首12场联赛不败嘅新帅，该季夺得欧霸盃冠军、英联盃亚军、英超季军，原本成绩唔错。不过，英联盃决赛末段，沙利想换走门将阿列沙巴拿加（Kepa），换入韦利卡巴尼路扑救12码，但却被Kepa拒绝，主帅权威荡然无存，「车仔」最後失落冠军。虽然沙利事後解释，将帅存在误会，但内心已意兴阑珊，结果季尾以要陪伴身处意大利嘅年迈父母为由，选择转投祖云达斯。

沙利执教「祖记」虽然捧意甲冠军，但因为欧联16强出局被炒，休息近1年时间，成为拉素主帅，无独有偶，拉素早前欧联16强被拜仁慕尼黑淘汰後，沙利认为球员已经唔支持佢，所以决定辞职。

林柏特英名一铺清袋

呢位「车仔」名宿两度执教呢间伦敦球队，第1次喺2019年夏天，当时「车仔」受困於财政公平条例冇得买人，只有1年教波经验嘅林柏特临危受命，佢大力提拔谭美阿巴谦、美臣蒙特、汤姆利、列斯占士等自家青训产品，刮起一股青春风暴，首季获第4，英足盃同欧超盃亚军，算系唔错。

但「车仔」翌季大事购入夏维斯、迪姆华拿等贵价货，「林伯」反而唔识教，成绩不进反退，喺2021年1月被炒，最讽刺系接替佢嘅杜曹季尾领军勇夺欧联。更估唔到系2023年4月，畀爱华顿炒鱿冇耐嘅「林伯」，竟然再有机会重返史丹福桥球场，但球队纯粹只系搵过渡领队代替朴达教埋季尾，而「林伯」不擅防守嘅问题未见改善，教咗11场赢得1场咁大把，系球队史上带队3场或以上胜率最低（9%）教头，梗系冇得留低喇，球员时代累积嘅英名一朝丧。

宾尼迪斯教到边炒到边

车路士2012年11月炒咗领队迪马堤奥，聘请曾带领利物浦捧欧联冠军嘅主帅宾尼迪斯，担任看守领队至球季结束，即使呢位西班牙名帅协助球队夺得欧霸盃冠军，但失落世冠盃，英超排第3位，未能获得续约。

宾尼迪斯落「车」後，教波生涯每况愈下，包括执教皇马仅半季就被炒，做纽卡素、爱华顿领队，成绩同样令人失望，甚至有1年半时间要去中超搵食，最威水只系帮拿玻里赢得意大利盃冠军。宾尼迪斯上年6月底成为切尔达教练，原本双方签约3年，但开季後，成绩差强人意，深受降班威胁，结果教咗唔够9个月，被切尔达提早解约。

希丁克回巢救火衰收尾

希丁克执教生涯多年，2009年2月佢教紧俄罗斯国家队期间，当时班主兼俄国油王阿布拉莫域，藉住关系成功游说希丁克嚟车路士「兼职」半季，呢位老江湖深明球员同前任领队史高拉利不和，系战绩曳爆嘅导火线，佢上任後立即拉拢杜奥巴、泰利等老将，成功稳定军心，杀上前4保住欧联入场券，以及取得英足盃冠军，光荣离任。

去到2015年12月，由於上季英超盟主「车仔」衰到跌落下游，「寸王」主帅摩连奴亦搞到众叛亲离被辞退，阿布再次搵当时「量地」嘅希丁克返嚟救火，不过呢位荷兰名帅已经「回塘」，领军各项赛事只得10胜11和6负，冇盃落袋之余，只能令「车仔」喺联赛升番上第10位，亦系阿布自从2003年入主球队以来，联赛成绩最差兼首度失落欧洲赛资格，希帅当然冇得留低，之後履历辉煌嘅佢教过中国Ｕ21同库拉索，冇再教豪门劲旅喇。

黑脚杜曹连累埋拜仁

德国教头杜曹执教车路士短短1年零7个月，但就经历过高山低谷，佢喺2021年1月加盟，只用半季就带领车路士喺欧联封王，期间经历俄罗斯油王阿布拉莫域被英国政府制裁，杜曹都患难与共。点知保利入主就成为杜曹噩梦开始，据报两人喺买卖球员出现意见分歧，车路士成绩亦直线下滑，终於喺2022年9月被炒。

杜曹离开车路士後小休半年，上年3月接掌德甲班霸拜仁慕尼黑，但喺呢间同样管理问题多多嘅球队，杜曹嘅成绩仍未如人意，今季喺联赛被利华古逊大幅抛离，2月份就提前宣布季尾离队。不过以杜曹嘅履历同欧联往绩，要落班唔难，不过佢喺巴黎圣日耳门、车路士同拜仁慕尼黑都以不快作结，唔知仲有冇豪门会向佢招手。

朴达心系豪门量地近1年

两年前仲系英格兰教练当红炸子鸡，佢带领白礼顿用蔗渣价钱踢出烧鹅味道，作为车路士新班主保利革命嘅第一帅，朴达当之无愧。可惜佢喺车路士发展不似预期，冇计划嘅收购、混乱嘅更衣室，都为朴达嘅领导制造唔少麻烦，最终成为只教过31场嘅车路士过客，更令佢之前教白礼顿嘅「英名」一铺清袋。

自上年4月被炒鱿後，朴达已经差唔多1年冇落班，虽然有唔少球会传出对佢有兴趣，但朴达似乎仍然想喺顶级豪门证明自己，据报过去1年先後拒绝格拉斯哥流浪同瑞典国家队斟介，尴尬嘅系顶级豪门亦未必愿意搵佢执教，或者朴达要先喺「中型班」再次证明自己嘅能力。

迪马堤奥虚火退居幕後

迪马堤奥踢波同教波都并非特别起眼，但却系车路士嘅「福星」，1996至2001年效力当时并非争标球队嘅车路士5个球季，并喺呢间伦敦球会结束球员生涯，先後帮球队赢过2次英足盃同1次欧洲盃赛冠军盃，而喺2011至12年球季，佢由助教临时转正，短短3个月就帮球队历史性赢到最想要嘅欧联冠军，堪称神奇。

时间返到2008年，迪马堤奥挂靴後6年，展开教练生涯，於2011至12年球季重返车路士，出任保亚斯副手，2012年3月，保亚斯遭辞退，迪马堤奥临危受命，以看守领队身份领军，车路士不断神奇赢波，包括欧联16强对拿玻里，首回合落後1比3绝境下，次回合反胜4比1晋级，一直杀入决赛。同年5月，迪马堤奥领军未够3个月，先喺英足盃决赛击败利物浦捧盃，再喺欧联决赛击败拜仁慕尼黑，捧走前班主阿布拉莫域梦寐以求嘅欧联冠军。

连捧两盃嘅佢，2012年夏天顺理成章「转正」，不过球队同时「虚火」已过，连场落败之下，喺同年11月被炒，结束辉煌而短暂嘅车路士主帅生涯。而佢离开车路士之後，曾经短暂执教史浩克04，2016年离开阿士东维拉後再无任教，上年更退居幕後，以技术顾问身份加入全北汽车。

保亚斯冇嘢捞被迫转行

保亚斯嘅车路士主帅生涯好短暂，仅维持不足10个月，前班主阿布拉莫域邀请佢2011年中由波图过档，以1,500万欧元打破当时主帅转会费世界纪录，接替离队嘅安察洛堤，球队拥有杜奥巴、费兰度托利斯、林柏特、泰利等猛将，只系会方对成绩要求过高，球队因为联赛失分太多，跌出前4，仲因为欧联16强首回合对拿玻里输1比3，濒临出局，结果保亚斯教唔足1季被炒，更为後来顶上嘅看守领队迪马堤奥作嫁衣裳。

执教车路士之前球季，保亚斯刚率领波图赢得联赛、葡盃及欧霸盃「小三冠王」，足以证明佢系有料之人，而接手车路士初期出唔到成绩，喺足球世界亦好正常，只不过阿布拉莫域冇耐性，又锺意炒教练，保亚斯先成为悲剧人物，而其後迪马堤奥以看守领队身份，协助球队连捧英足盃同欧联冠军，亦证明保亚斯组建嘅球队系有实力，只系时不予佢。之後执教热刺再次因为战绩欠佳被解雇，後来去过辛尼特以及马赛领军，之後再冇执教过球队，2018年更一度「转行」做车手。