周一(7日)凌晨意甲，祖云达斯主场以2比0打败维罗纳，早前以7,000万欧元转会费加盟祖记嘅前锋杜辛华荷域踢出身价波，首次上阵就取得入球，十分高效率，祖云达斯有咗呢位新7号，球迷可以忘记C朗。

杜辛华荷域今季为费伦天拿喺各项赛事上阵24场入20球，转投祖记之後继续保持「高效杀手」本色，开赛13分钟，呢位22岁塞尔维亚国脚单刀，趁门将出迎，笠射入网，十分洒脱。

杜辛华荷域今场5次射门有4次中目标，今季意甲累积入18球，欧洲5大联赛之中，仅次於入24球嘅拜仁慕尼黑前锋罗拔利云度夫斯基。

祖云达斯另一位新兵萨卡利亚今场亦以正选上阵，并喺61分钟为球队射成2比0。呢位25岁瑞士国脚唔止入波，仲有4次拦截、2次抢断，86%传球成功率，充分发挥防守中场嘅作用，祖记喺冬天转会商场收买十分成功。