近况大勇嘅巴塞隆拿，周一(28日)凌晨西甲主场4比0大破毕尔包，上月由阿仙奴加盟嘅奥巴美扬入波停不了，今场攻入佢近3仗第5个入球。教练沙维赛後信心爆棚，仲话唔排除巴塞隆拿有机会争联赛冠军添！

巴塞今仗表现出色，37分钟碧基头槌顶中楣，奥巴美扬「窝利」补射入网，近3场赛事攻入5球。巴塞领先後一直控制战局，不过要到奥士文尼迪比利67分钟後备登场，先至展开「大屠杀」，呢位法国翼锋73分钟左路突破狂抽建功，补时阶段更2度交助攻，造就卢克迪庄同迪比入波，带领巴塞大胜4比0。

奥巴美扬加盟巴塞後，头4场西甲攻入4球，近半世纪只有6个巴塞球员做到，包括罗马里奥、李华度、拉拿、伊巴谦莫域同法比加斯，奥巴美扬就系第6个。巴塞依家排联赛第4位，落後榜首皇家马德里15分但少踢1场，沙维赛後被问到有冇机会後上捧盃，佢就话：「我唔排除任何可能性，皇马好强大，我哋依家要先争第3，之後再争第2，如果做得到就争第1，用谦虚态度迎接下一场比赛。」