曼联门将迪基亚今季表现神勇，堪称红魔鬼最佳球员，英国《天空体育》爆料，指曼联管理层计划提早今夏同呢位31岁西班牙国脚续约。由於迪基亚现时周薪已高达37.5万镑，预料佢续约之後，人工可望突破40万镑周薪。

迪基亚将於明年夏天约满，虽然届时曼联有权同佢自动续约多1年，但管理认为仲未足够，希望提早同迪基亚续长约，令佢可以专心为球队搏杀。

迪基亚上季曾经一度表现低迷，但今季重拾颠峰水准，多次喺比赛中作出「神救」，并当选英超1月最佳球员，成为近6年以来首位获此殊荣嘅门将。

值得一提，迪基亚效力曼联11年以来，已累积129场英超冇失波，超越名宿舒米高，成为英超史上前10位最多「零封」对手嘅门将，绝对值得续约。

一般相信迪基亚续约之後，周薪有望超过40万镑，仲可能加入同表现及球队成绩挂勾嘅奖金。