周二（15日）深夜马德里体育会，将会喺欧联16强次回合作客曼联。赛前依支西甲劲旅就「出口术」，大打心理战，据悉有意喺今夏签入对方失意球星拉舒福特，以取代35岁老将苏亚雷斯。

马体会前线原本继绩靠苏亚雷斯担大旗，不过依名乌拉圭球星今季入球产量大减，各项赛事上阵36场，只系射入11球；据悉球会考虑到苏亚雷斯年纪渐大，今夏无意同佢续约，反而希望从曼联引入失意嘅拉舒福特，依名英格兰新星今季表现未如理想，各项赛事上阵25场，只系交出5入球、2助攻，近期仲畀艾兰加抢埋正选位。

拉舒福特同曼联合约下年夏天就完约，而暂代主教练兰历克曾经话佢可以喺今夏离队，相信走人机会甚高。除此之外，今个夏天即将成为自由身嘅祖云达斯前锋保罗戴巴拿，有指亦系马体会嘅收购对象。