巴塞隆拿喺「国家打吡」大炒皇马4比0，冬季转会窗加盟嘅奥巴美扬光芒四射，今场系佢首次出战「国家打吡」，结果交出2射1传嘅超卓表现。当奥巴美扬射入自己第2球後，喺场边拎出一粒「龙珠」嚟庆祝，身为呢套日本漫画粉丝嘅佢表示，赛前曾向「龙珠」许愿，将今场入波献畀已去世嘅祖父母。

32岁嘅奥巴美扬冬天由阿仙奴加盟後，表现脱胎换骨，近8场赛事攻入9球，今场「国家打吡」首演就有2射1传，对上一个喺「国家打吡」首战就献出2射1传嘅球员，系1953年嘅皇马传奇迪史堤芬奴，奥巴美扬系69年来第1人。

作为《龙珠》拥趸，奥巴美扬身上亦有呢套漫画嘅纹身，赢到4比0後佢去场边拎出一粒「龙珠」，并且做出漫画主角悟空嘅标志动作，佢赛後解释：「呢粒波系龙珠，有咗佢你就可以许愿，我希望赢波同为已过身嘅祖父母入波。」奥巴美扬细个曾承诺外公，终有一日会去西甲，虽然佢当初应承要效力皇马，但就相信外公仍会为佢表现自豪。