曼联决定今夏签入1位顶级射手，减轻C朗负担，英国《太阳报》爆料，指红魔鬼睇中宾菲加前锋达云纽尼斯，估计呢位22岁乌拉圭国脚身价达6,800万镑。不过，钱并唔系最大问题，达云纽尼斯要求加盟1支有份踢下届欧联嘅球队，呢项条件先至系曼联能否签入佢嘅最关键因素。

身高1米87嘅达云纽尼斯集力量、技术、速度於一身，可以胜任中锋及左翼，被称为「新卡云尼」，佢今季为宾菲加各项赛事上阵33场，轰入26球，入球率极高，其中今届欧联有4球进帐，包括16强次回合对阿积士，顶入全场唯一入球，成为晋级8强嘅大功臣。

达云纽尼斯亦成为欧洲各大豪门争夺目标，当中以曼联同阿仙奴最渴望签入佢，原本宾菲加索价1.27亿镑，但由於达云纽尼斯希望今夏离队，会方见佢去意已决，愿意将转会费降至6,800万镑。

除咗转会费及个人薪酬待遇之外，达云纽尼斯希望加盟1支有份踢下届欧联嘅球队，曼联今届欧联已出局，现时排英超第6位，落後第4位阿仙奴4分，兼踢多对方1场，想打入前4位夺取下届欧联入场券，并唔容易。

不过，曼联同宾菲加关系良好，曾於2017年以3,500万欧元签入当时效力宾菲加嘅中坚域陀连迪路夫，加上卡云尼踢紧曼联，或者可以做说客，帮手劝国家队队友达云纽尼斯成「魔」。