周日(3日)凌晨意甲，拉素主场以2比1击败萨斯索罗，但焦点却落喺後备席上嘅19岁小将鲁尔摩奴身上，因为呢位前锋口肿面肿，眼睛周围瘀黑，原来佢日前同爸爸遭4名假扮警察嘅匪徒打劫，仲被殴打，幸好只系皮外伤，坚持随队出征。

拉素凭文路尔沙拿利、米连高域沙域各入1球，全取3分，鲁尔摩奴并冇上阵，但就引起镜头注意，因为佢面部伤痕累累，大家都担心呢位西班牙新星嘅情况。

根据《罗马体育报》报道，鲁尔摩奴日前同爸爸开车外出，有4名假扮警察嘅匪徒设下路障拦住佢哋，唔单止抢走财物同汽车，仲打咗佢哋一身，幸好冇伤及要害，鲁尔摩奴之後仲可以返回球队操练，并列入今场大军名单。

鲁尔摩奴出身於巴塞隆拿青年军，2年前加盟拉素，佢今季意甲曾经11次上阵，但主要都系後备披甲，并未取得入球。