欧联8强抽签後，唔少球迷都认为拜仁慕尼黑抽到「上签」，对住喺西甲只排第7位嘅维拉利尔。不过呢支「黄色潜艇」周四(7日)凌晨做出好戏，主场1比0爆冷击败拜仁慕尼黑，终止该德甲班霸差唔多5年嘅欧联作客不败纪录，而拜仁对上一次作客输波，对手主帅正正就系维拉利尔教练艾美利。

拜仁慕尼黑今场作客西班牙表现失常，虽然控球较多但攻门冇乜威胁，反而维拉利尔拳拳到肉，8分钟就由荷兰前锋哥尔尼维特近门射入，41分钟高基连曾精彩笠入，可惜越位在先被判诈胡。下半场维拉利尔再有多次黄金机会，谢拉特摩兰奴先射中柱，再有半场笠空门仅仅斜出，但「黄色潜艇」最终仍然赢1比0。

拜仁慕尼黑对上一次喺欧联作客输波，已经系2017年9月嘅事，当时佢哋输畀巴黎圣日耳门，对手主帅就系今场维拉利尔教头艾美利。艾美利赛後表示：「我哋今场踢出近乎完美嘅比赛，美中不足就系冇赢得更大比数。」