穆罕默德沙拿喺同利物浦续约嘅问题上，近日迎嚟突破性进展，据闻沙拿已打算延续佢嘅「红军」生涯。不过当被问到同球队倾成点嘅时候，佢就三缄其口，话因为唔想影响到球队争冠喎。

29岁埃及球王沙拿同利物浦续约出现转机，盛传佢将接受球队给予嘅40万镑周薪条件。近日当佢被问到球队倾成点嘅时候，佢似乎唔愿多谈：「有好多嘢啲人未必知，我唔能够自私地透露自己嘅情况，因为球队目前正处於一个好重要嘅时期，我只希望讨论有关球队嘅事。」

利物浦周日（10日）将出战可谓今季最重要嘅赛事，与曼城正面交锋，加上下周中出战欧联8强次回合，呢两场比赛将决定「红军」今季能唔能够成为「4冠王」。而沙拿唔想喺呢个时候为球队「添烦添乱」，都唔系冇佢嘅道理。「球队要赢冠军，我唔能够讨论太多合约嘅事，我只想专注为球队付出。呢啲系我目前唯一可以讲，希望我哋朝住正面嘅方向进发。」佢话。