曼联今季连续第5季「四大皆空」，有球迷组织发动周六(16日)喺奥脱福球场进行「反格拉沙」示威，而有数十「魔迷」更率先出手，周五(15)去到卡宁顿训练基地外示威，除咗要求格拉沙家族下台外，更拉横额攻击部份球员「唔配着曼联波衫」，曼联为防止突发事情发生，立即报警求助。

曼联球迷组织「The 1958」喺周六晚对诺域治嘅联赛前，号召球迷进行示威，包括喺比赛头17分钟奥脱福外站立，表示佢哋对格拉沙「统治」17年嚟嘅不满。不过有几十名球迷周五先去卡宁顿训练基地表态，拉起「格拉沙OUT」嘅横额，亦有横额矛头指向球员，写上「可耻，唔配着曼联波衫」，有人更点起红烟兼大叫口号。

去年有曼联球迷闯入奥脱福球场抗议并大事破坏，搞到联赛都要延期，曼联为免历史重演，今次亦报警以防万一，曼联发出声明表示：「卡宁顿训练基地外有小型及和平示威，我哋尊重所有球迷嘅意见，亦决心同球迷有更好嘅沟通。」