丹麦中场基斯甸艾历臣喺上年欧国盃期间心脏病发，几乎魂断球场，死过翻生後今年喺英超表现突出，为宾福特上阵6场已有1入波同2助攻，周日(24日)凌晨倒戈热刺前，热刺领队干地亲口证实想签番呢位30岁中场，今夏有望以自由身重返热刺。

基斯甸艾历臣喺2013至2020年间效力热刺，之後就转投由干地执教嘅国际米兰，依家干地成为热刺主帅，对呢位旧部亦非常挂念，佢喺对宾福特赛前被问到有冇兴趣签番基斯甸艾历臣，干地直接表示：「当然有！同艾历臣再次合作系好好嘅机会，我好享受同佢喺国际米兰嘅时光，而且仲一齐赢意甲冠军，有咁好嘅球员，个个领队都会想同佢合作。」

基斯甸艾历臣今年1月同宾福特签约半年，夏天就会回复自由身，而佢近期表现已证明自己仍然可以喺英超立足，免费转会无疑系非常吸引。基斯甸艾历臣病愈後已重返丹麦国家队，目标系出战年底嘅世界盃决赛周。