向住三冠王目标进发嘅曼城，据报今夏准备再斥巨资收购球员，西班牙《机密报》爆料，领队哥迪奥拿对西班牙中场米基尔马连奴情有独锺，球会已准备好5,000万镑嘅违约金，直接向皇家苏斯达买断佢份合约！

曼城嘅巴西中场费兰甸奴踢埋今季离队，不过哥迪奥拿似乎已搵到呢位36岁中场接班人，就系皇家苏斯达中场米基尔马连奴。据《机密报》报道，曼城睇过佢系西甲以及西班牙国家队演出後，已经认为呢位25岁中场系合适人选，虽然佢同皇苏合约去到2025年，但合约中有5,000万镑买断条款，曼城亦好乐意支付。

其实米基尔马连奴对英超并唔陌生，2017/18球季就曾经效力纽卡素，不过当时年轻嘅佢表现未见突出，但近4季喺皇苏愈踢愈好，更成功跻身西班牙国家队，同曼城中场洛迪卡斯简迪一齐合作。曼城喺2019年签入洛迪卡斯简迪，同样系以买断合约方式，直接支付6,200万镑转会费由马德里体育会「抢人」。