曼联官宣坦哈格来季执教後，曼联继续输波，1比3不敌阿仙奴，不过另边厢阿积士未受影响，上仗作客1比0击败奈梅亨，继续领先次席燕豪芬4分，再赢3场就捧盃，该仗为阿积士入波奠胜嘅前锋布罗比，竟然系赛後记者会当众搲捞，希望坦哈格带埋佢走，咁都得？

20岁嘅布罗比系荷兰小国脚，阿积士青训出身，上季转投RB莱比锡，今季以外借身份回巢阿积士，今季上阵9仗入4球，佢上仗作客奈梅亨，喺完场前88分钟射入3分波，成为赢波功臣，赛後被传媒扑咪围访。

佢赛後对坦哈格执教曼联表示祝贺，跟住佢话：「我为佢感到十分高兴，佢为阿积士做咗咁多，佢绝对配得上，如果佢可以将我带走，未来两年再同佢一齐......唔系唔系，讲笑咋。」

虽然佢话讲笑，但网民唔系咁睇，认为佢真系咁谂，希望坦哈格带埋佢过档，事实上之前亦有传闻坦哈格打算带兵过档，不过并非布罗比，而系名气更大嘅另一射手安东尼马菲奥斯，以及中坚添巴。当然，相信唔止布罗比，阿积士好多球员都希望坦哈格带埋佢哋走。