皇家马德里勇夺西甲冠军後，大军跟从传统坐巴士去到马德里地标丰收女神像庆祝，沿途有近万球迷夹道欢迎，一众职、球员就喺巴士上面载歌载舞，不过喺欢欣画面背後，威尔斯球星加里夫巴利就成为唯一「甩底」球员，行将约满离队嘅佢好像对呢个冠军唔多上心。

大胜爱斯宾奴之後，皇马球员先喺巴拿贝球场庆祝，之後就坐开蓬巴士驶去丰收女神像，由队长马些路做代表亲吻神像。呢个冠军Party一切球员都到齐，包含今场受伤缺阵嘅夏萨特、卢卡祖域同阿拉巴，以及停赛嘅拿祖费南迪斯同艾达米列达奥，只有加里夫巴利「冇影」。

加里夫巴利事後喺社交网留言：「冠军！由于背伤关系，好失望唔可以参加今次庆祝，但为呢支冠军球队感到荣耀，好好享用！」呢位32岁威尔斯国脚同皇马合约季尾完结，盛传佢会去美职搵食，佢喺今季西甲上阵5次兼有1个入球，呢个冠军佢都有出一分力。