西班牙《阿斯报》指巴黎圣日耳门(PSG)非常有兴趣签入巴塞隆拿翼锋奥士文尼迪比利，并开出税後1,700万欧元年薪，利诱呢位即将25岁嘅法国国脚加盟，顶替今夏好可能转投皇马嘅基利安麦巴比。

奥士文尼迪比利将於今夏约满，虽然巴塞隆拿管理层积极同迪比利嘅经理人谈判续约问题，但仍然未达成协议，PSG今次出天价薪酬吸引奥士文尼迪比利，唔排除佢会选择重返法甲搵食。

奥士文尼迪比利出身於雷恩青训系统，曾为雷恩出战2015/16年球季法甲，上阵26场联赛入12球，随後转投德甲劲旅多蒙特，2017年夏天以1.05亿欧元转会费加盟巴塞隆拿，但表现经常备受批评，如果佢今夏自由身离队，巴塞就真系蚀大本。