皇家马德里将於周六(30日)晚西甲主场对爱斯宾奴，皇马只要和波都够分提早捧盃，但球星加里夫巴利又冇份入选大军名单，据悉佢声称背部有伤，但西班牙传媒抱怀疑态度，认为呢位32岁威尔斯国脚一心等今夏约满离队，唔想再为皇马上阵。

皇马将於下周中欧联4强次回合对曼城，预料今场联赛将会轮换阵容，畀部份主力休息，原本外界以为加里夫巴利今场终於有机会表现身价，点知连後备都冇份。

西班牙《阿斯报》指加里夫巴利感到背部痛楚，唔适合比赛，所以落选大军名单，但当地传媒唔多相信，认为巴利有冇背痛，只有佢自己知，因为上月对巴塞隆拿，佢都以背痛拒绝参赛。

加里夫巴利今季仅为皇马上阵290分钟，早已经成为皇马可有可无嘅球员，相信教练安察洛堤都唔会介意佢缺阵。