荷兰国脚翼锋贝云积喺热刺未受重用，长坐冷板嘅佢日前接受荷兰媒体《AD》专访，承认自己喺热刺时日无多，而讲到未来去向嗰阵，呢位24岁球星表示乐意过档曼联，跟荷兰教头坦哈格搵食，形容转会「红魔鬼」系有可能。

贝云积今季英超只踢过4场正选，1月对李斯特城曾补时连入2球神奇反胜，佢喺访问入面表示：「我以为对李斯特城场波後，我会有更多上阵时间，但事实并唔系咁。老实讲我知道自己冇可能做到热刺正选，原因好复杂，去阿积士系一个选择、返荷甲系一个选择，尤其世界盃就快展开。」

来季将会执教曼联嘅坦哈格，执教阿积士期间对贝云积了如指掌，今年1月阿积士亦曾2度提出收购贝云积，但倾唔掂转会费而拉倒，据闻坦哈格仍想将呢位前燕豪芬球星带去曼联，贝云积就回应：「我暂时未同坦哈格倾过，但边个会知将来发生咩事？或者转会曼联真系有可能。」