德甲班霸拜仁慕尼黑，近日宣布与阵中攻击手汤马士梅拿续约至2024年，意味呢位前德国国脚，有望喺呢支效力至退役。

现年32岁嘅汤马士梅拿，2000年加入拜仁青训，自2008年出道後，就一直喺呢支德甲班霸效力，期间帮助球队赢尽各大锦标，包括2次於欧联封王，以及11次捧起德甲冠军。对於成功续约，汤马士梅拿直言感到高兴：「自2000年加入青年军以嚟，我喺拜仁效力嘅时光就系一个成功嘅故事，无论场内场外，即使喺困难嘅时刻，我每年都好享受穿起拜仁波衫。」

拜仁公布续约消息嘅同时，仲喺社交网站上载汤马士梅拿儿时身穿拜仁球衣嘅相片。球会体育总监沙历咸美斯，就形容呢位球队旗帜性人物，同拜仁关系密不可分：「无法想像冇拜仁嘅汤马士梅拿，反之亦然。」拜仁行政总裁简尼，则提到汤马士梅拿对拜仁嘅重要性：「拜仁嘅队徽烙印喺佢心中，佢系一名领导者，亦系更衣室内非常重要嘅一员。」