西甲球坛爆出性丑闻，效力切尔达嘅西班牙前锋辛迪文拿，被控喺2017年强奸一名女子，周三(4日)被法院裁定罪名成立，判监4年。辛迪文拿已经作出上诉，而切尔达就宣布喺上诉期间暂时将呢位射手由大军中除名。

案发时间系2017年，当时辛迪文拿仲系效力华伦西亚，佢被控喺一架露营车入面将一名女子强奸，当时车内仲有另一位喺低组别踢波嘅球员高达，虽然佢冇作出性侵，但就对辛迪文拿行为视若无睹。法院判决辛迪文拿性侵罪成判监4年，而高达嘅同谋罪名就唔成立。

辛迪文拿律师已就判决提出上诉，切尔达随即发声明，表示会对辛迪文拿作出纪律调查，并会喺结果出现前将佢暂时「停职」，剔出球队大军名单。26岁嘅辛迪文拿系切尔达主力，今季33场联赛攻入7球，系队中次席射手。