曼联嘅失望球季嚟到尾声，作客白礼顿惨吞4蛋标志住今季嘅失败，不过最令球迷心寒嘅，系出晒名斗志惊人嘅C朗拿度，竟然系球队输到0比3後，露出无奈兼诡异嘅笑容，「输到笑」一幕令球迷都寄以无限同情。

曼联上半场输1粒，换边後更中门大开，57分钟输到0比3嗰阵，C朗被影到喺中场叉住腰苦笑兼拨头发，似系笑紧後防队友被对手玩残，领队兰历克输到4球後更要用哈利马古尼入替桑马达，希望减少失球数字，足证曼联防线有几唔掂。

对於C朗「输到笑」一幕，唔少球迷都话戥佢难过，有球迷留言：「唔好怪C朗笑，因为曼联嘅表现真系好好笑。」前利物浦领队桑拿士表示：「你睇到佢谂紧乜，佢谂紧之前效力曼联嗰阵，队友系坚尼、史高斯、里奥费迪南，但依家要同呢班人合作......」