周一(9日)凌晨西甲「马德里打吡」，已夺联赛冠军嘅皇家马德里收起大部份主力下，作客0比1不敌马德里体育会。马体会赢波後前4位置相当稳阵，而皇马教练安察洛堤就表明会继续轮换，畀一众主力养精蓄锐踢欧联决赛。

皇马今场收起宾施马、莫迪历、泰拔高图尔斯等主力，面对要为前4位置搏命嘅马体会处於下风，40分钟马菲奥斯根夏禁区内被侵犯，恩历克卡拉斯高操刀射入。换边後马体会继续主导比赛，恩历克卡拉斯高曾射门中柱，但无阻主队全取3分。马体会依家领先第5、6位嘅贝迪斯同皇家苏斯达6分及8分，只剩3轮联赛下，前4位置颇为稳阵。

至於「放水」嘅安察洛堤，赛後就坚持自己决定：「我哋要确保疲劳嘅球员唔会出现任何身体问题，亦要畀较少上阵嘅球员有出场时间，之後嘅比赛都会咁样。宾施马、莫迪历、云尼斯奥斯祖利亚会有机会落场，因为要畀佢哋保持比赛节奏，我哋会如常咁去备战。」