自从C朗拿度向曼联提出转会要求後，以「家庭理由」请假超过1个星期，周五(15日)终於首度「蒲头」，喺IG贴出自己单独喺健身房做Gym相片，而且健身期间着嘅系曼联波裤，唔少网民都认定C朗系暗示会继续留效曼联！

C朗向曼联请假後一直未有现身，有传佢去过葡萄牙国家队嘅训练基地单独练习，不过周五佢突然喺IG贴出做Gym相，简单留言：「努力工作」。赤身上阵嘅佢Show出一身肌肉，不过最吸睛嘅反而系下半身，因为C朗着嘅系曼联上季练习波裤，大批网民指佢系作出留队最大暗示。

消息指除沙特阿拉伯球会嘅开价外，目前欧洲未有球会提出收购C朗，车路士、拜仁慕尼黑目前都否决引入C朗计划，令C朗想走都未必走得到。曼联领队坦哈格周四(14日)喺澳洲嘅记者会，亦再次表示C朗会留队：「我哋之前已经发出声明(C朗留队)，依家并冇任何改变。」