周六(16日)晚喺南韩举行嘅季前热身赛，热刺同西维尔打和1比1，热刺射手孙兴民喺自己地头，有恃无恐变身「茅柴」，批肘打到对手蒙迪尔爆嘴流血，似足「呕血」，场面非常恐怖。

呢一幕血腥场面发生喺上半场尾段，西维尔後衞蒙迪尔从後抢截孙兴民，点知食咗对手一肘，即时血流如注，需要离场治理，以及更换染有血迹嘅球衣。

据悉上半场结束之後，蒙迪尔搵孙兴民理论，幸好双方球员立即上前劝交，先至冇酿成更大冲突。

蒙迪尔下半场并冇上阵，换边後仅5分钟，孙兴民传畀哈利卡尼射入，为热刺打开纪录，西维尔由拿杰迪锡远射入网扳平1比1。热刺完成亚洲之旅，下场热身赛将作客格拉斯哥流浪。