车路士早前重金签入拿玻里中坚高列巴尼，呢位31岁球星过去8年喺意甲「统治级」嘅表现，令佢被誉为意甲最佳中坚之一，不过曾执教车路士同拿玻里嘅宾尼迪斯就警告，高列巴尼有唔少弱点，喺英超未必可以有最好表现。

宾尼迪斯喺2013年至15年间执教拿玻里，同高列巴尼合作无间，但佢认为呢位塞内加尔中坚未必踢得掂英超：「佢要改善集中力问题，有时会突然失魂或者太有自信。高列巴尼踢法同鲁迪格有啲似，都系擅长运球嘅中坚，佢喺意甲完全冇问题，但我好怀疑佢喺英超系咪都一样，尤其佢嘅头槌唔系十分好，意甲冇咁着重高空波，不过英超就完全唔同。」

车路士用3,400万镑签入已经31岁嘅高列巴尼，领队杜曹对佢明显充满信心，宾尼迪斯亦指高列巴尼好肯学习，指车路士教练有机会改善佢头槌唔好嘅弱点。