皇家马德里季前美国之旅第2站，喺三藩市斗墨超球队CF阿美利加。「银河舰队」今季基本上保留欧联冠军班底，一众球员合作多年唔使特别磨合，上场半力出击斗巴塞隆拿志在搵番比赛节奏，今场面对近期征战频繁嘅「最佳饭脚」CF阿美利加，有望一挞即着，好大机会半场已经早早领先。（myTV SUPER周三早上10时30分直播）

皇马今次美国之行阵容鼎盛，新兵曹亚文尼及鲁迪格亦已加入，上仗大战巴塞隆拿虽以0比1败阵，但领队安察洛堤上半场只系派半力出击；主力前锋宾施马啱啱向球会报到，上仗连後备名单都冇佢份，经过操练後今场有望上阵，加上一众球星经过一场热身，状态正式提升，今场可望有更好发挥。皇马大部分球员已合作多年，就算季前热身亦唔使特别花时间磨合，球队近8次踢球会赛5次半场领先，绝无放软手脚嘅忧虑。

CF阿美利加成为欧洲豪门「最佳饭脚」，喺墨超已经开咧之下，仍抽空同列强踢多场热身赛，仲要墨西哥、美国多个城市两边走。CF阿美利加先後不敌车路士同曼城，今场已经系球队14日内第5场比赛，听到都觉得攰，而且佢哋同皇马实力差距更大，今场志在收吓表演金同交换吓波衫，唔会同皇马硬碰，相信「银河舰队」半场已经可以好快搵到士哥。