C朗拿度转会闹剧迈向结局篇！据英国传媒报道，曼联开操後已请假超过3星期嘅C朗，已由葡萄牙飞返曼彻斯特，目前未知佢会唔会出席周二(26日)嘅练习，但就会同领队坦哈格会面商讨去留问题。曼联仍然坚持C朗系球队计划重要部份，但呢位37岁老将就去意已决，今次会面将令发展有更明显方向。

曼联完成亚洲、澳洲热身之旅後，大军已经飞返英国备战新球季，全队周一(25日)获准休息後周二复操，《The Athletic》报道C朗亦都由葡萄牙飞去曼彻斯特会合，球会视C朗归队为积极讯号，不过C朗会唔会参加操练仍然系未知之数，佢喺过去3个星期以「家庭理由」请假期间，一直喺葡萄牙单独练习。

自C朗提出转会要求後，佢同坦哈格从未进行沟通，今次会面将系两人直接交换谂法嘅机会。职业生涯从未踢过欧霸盃嘅C朗，一直想转投另一队可以踢欧联嘅球队，经理人佐治文迪斯努力向各大豪门联系，但车路士、拜仁慕尼黑、巴黎圣日耳门等球会都冇意思收购，近日盛传马德里体育会系可能目的地。

曼联方面，消息人士指球队对留低C朗有信心，坦哈格喺集训期间多次强调曼联冇兴趣卖走C朗，甚至暗示会考虑启动C朗合约中续约1年条款。曼联今个夏天已签入杜维尔马拉西亚、基斯甸艾历臣同利辛度马天尼斯3名新兵，希望向C朗展示球队加强实力嘅决心。