C朗拿度返曼联报到报，周二(26日)联同经理人佐治文迪斯同领队坦哈格等曼联高层「摊牌」。据英国《每日邮报》报道，双方嘅立场都冇改变，曼联仍然指C朗系「非卖品」，目前亦冇收到任何报价，而C朗就坚持要求转会，更加向曼联提出解约要求，令佢可以自由转会。

《每日邮报》消息指，90分钟嘅会面并冇影响到双方立场，C朗仍然希望可以成功转会，但佢亦知道能够提供合适财政计划嘅球会唔多，所以C朗要求提前1年将佢份36万镑周薪合约取消，以自由转会嚟提升吸引力，呢位37岁老将早前亦表示愿意减薪3成。

报道指C朗喺未实现转会目标前，会以「专业态度」继续履行合约，包括操练同上阵比赛，消息指曼联周日(31日)对华历简奴嘅热身赛，预料会派出副选同青年军球员上阵，啱啱展开单独操练嘅C朗有机会喺呢场上阵提升状态。