今夏一直缺席曼联季前集训嘅球星C朗终於准备好复出，佢透过社交网宣布，将会出战周日(31日)晚热身赛主场对西甲球队华历简奴，似乎已经谂通咗，都系留队比较划算。

C朗因为「家庭原因」、「转会问题」冇份参加曼联亚洲之旅，已经缺阵4场热身赛，加上呢位37岁葡萄牙国脚刚於周五(29日)首次同球队一齐操练，所以亦赶唔切出战香港时间周六(30日)晚上7点45分开波嘅热身赛对马体会。

不过，C朗喺社交网发文话：「周日王者上阵。」暗示自己将於香港时间周日(31日)晚上11点举行嘅热身赛复出对华历简奴，呢场波亦系曼联出战新一季英超之前，最後1场热身赛。

C朗去留问题众说纷纭，佢早前寸传媒话：「媒体日日都要攞我做话题，否则赚唔到钱，我哋都知道，如果唔作故仔，就吸引唔到眼球，但如果继续落去，总会被一些讯息蒙骗。」至於C朗最终情归何处，相信好快有答案。