利物浦新球季先拔头筹！「红军」周日(31日)凌晨喺社区盾3比1击败死敌曼城，用奖盃为新球季揭开序幕，呢个冠军唔单止令利物浦先声夺人，亦系「标王」达云纽尼斯上位一战！赛前受到注目嘅神锋大战，达云纽尼斯後备上阵博到12码兼有入波，完胜最後阶段空门失机嘅艾宁夏兰特。

呢场喺王权球场上演嘅大战，曼城有艾宁夏兰特正选挂帅，而利物浦就先将达云纽尼斯摆後备。21分钟「红军」右闸阿历山大阿诺特禁区顶妙射抽入，半场领先1比0。曼城下半场早段换入祖利安艾华利斯、菲尔科顿反扑，利物浦亦畀达云纽尼斯登场，70分钟祖利安艾华利斯近门执鸡帮曼城追平。

最後阶段达云纽尼斯大爆发，82分钟头槌攻门博到鲁宾戴亚斯手球，穆罕默德沙拿操刀射入12码，呢位乌拉圭前锋补时阶段再喺门前头槌顶入，成为利物浦捧盃「关键先生」。表现失色嘅艾宁夏兰特，完场前有黄金机会，但门前2码面对空门竟然射中楣，锋芒被达云纽尼斯完全掩盖。

利物浦领队高普赛後为纽尼斯大平反：「依家呢个世界，所有人都喺第1眼就作出判断，咁样系唔啱，但就经常出现。头几场热身赛球队状态不足，我哋不断传波畀纽尼斯追，追得几次佢已经冇晒力，但系大家就批评佢控球差之类，简直系笑话！我哋要习惯呢个情况，纽尼斯就处理得好好，有耐性嘅人终於明白纽尼斯有几劲。」