利物浦今年重整锋线，1月先有路尔斯戴亚斯加盟，今夏又重金签入达云纽尼斯，加上王牌射手穆罕默德沙拿续约，呢条锋线无疑极有睇头。不过，上季表现突出嘅迪亚高祖达并冇被遗忘，利物浦周二(2日)宣布已同呢位葡萄牙前锋续约5年，加人工奖励佢嘅优异表现。

25岁嘅迪亚高祖达2年前由狼队加盟利物浦，演出稳步上扬，上季英超有15个入球，虽然佢同利物浦仲有3年合约，但领队高普视佢为未来计划核心成员，所以提前同佢续约5年，迪亚高祖达表示：「好荣幸可以续约，呢张合约证明球会对我好有信心。」

迪亚高祖达目前周薪系9万镑，远低於穆罕默德沙拿新约嘅40万镑周薪，报道指新合约肯定会大幅提升薪酬，目前利物浦政策系以「重奖金」形式出粮，部份薪酬会以丰厚奖金形式支付。迪亚高祖达目前仍然养伤，预计仲要数个星期先可以复出。