C朗拿度要求离开曼联嘅闹剧持续，一直坚持唔会卖走C朗嘅领队坦哈格，日前终於忍无可忍，接受荷兰媒体访问嗰阵首度公开批评C朗嘅专业操守，直指佢喺上场热身赛提早离场系破坏团结，行为「不能接受」。据报曼联周日(7日)英超开锣战对白礼顿，C朗将会被贬为後备。

曼联上周日友赛华历简奴，因「家庭原因」请假半个月嘅C朗首度复出，但表现差劲半场被换走，佢更被影到喺比赛未完已经离开球场，引嚟球迷质疑。坦哈格喺MUTV赛後访问对C朗离场事件只字不提，但日前接受荷兰媒体《Viaplay Sport》访问就大爆发，上任後首度公开批评C朗。

对於C朗提早离场事件，坦哈格表示：「有其他球员都选择提早离场，咁代表我哋要宽恕呢啲行为？绝对唔系！呢种行为不能接受，对任何球员都系一样。我同球员讲呢种做法(提早离场)系唔能够接受，我哋一支球队、一个团体，球员要一齐留到最後一刻。」

曼联方面未证实C朗有冇受到处分，但呢位葡萄牙国脚嘅「红魔生涯」亦陷入低点，英国《太阳报》报道，虽然C朗回巢後几乎系必然正选，不过坦哈格认为佢状态不足，开锣战对白礼顿会将佢贬为後备。C朗对上一次被通知要後备，系今年3月嘅「曼市打吡」，C朗当时得悉後即报称受伤飞返葡萄牙，令领队兰历克不满，唔知C朗今次会唔会乖乖做後备。