坦哈格成为曼联领队之後，重点争取签入昔日喺阿积士合作过嘅球员，包括早前加盟嘅中坚利辛度马天尼斯，呢位荷兰名帅依家又有目标，就系车路士翼锋薛耶治。

29岁嘅薛耶治曾於2016至20年效力阿积士，同坦哈格合作过2年半，呢位摩洛哥国脚加盟车路士之後，并不受重用，上仗英超对爱华顿亦冇份踢，早前已传出车仔打算将佢出售畀AC米兰，如果曼联出手截胡，应该有机会成事。

不过，坦哈格最想都系收购阿积士翼锋安东尼马菲奥斯，但阿积士要求8,000万欧元转会费，令曼联却步，坦哈格先至会退而求其次，转为向薛耶治埋手。