季前大事增兵嘅巴塞隆拿，西甲开锣战雷声大雨点小，罗拔利云度夫斯基首演连环失机，最终主场只能够同华历简奴踢成0比0平手。巴塞教练沙维赛後指球迷期望太高，令球员感到压力，而沙维亦成为近20年胜率最低嘅巴塞教头。

巴塞喺开咧前赶及为罗拔利云度夫斯基、拉芬夏比洛尼等新球注册，2人今场搭住奥士文尼迪比利组成三叉戟，虽然大部份时间围攻对手，但把握力就认真麻麻，「罗拔仔」全场5次射门无功而还，完场前更有布斯基斯两黄一红被逐，最终闷和0比0，今次亦系巴塞自1968年後，首次喺西甲首场主场赛事入唔到波。

自沙维上任後，球队胜率只有52.63%，系20年来胜率最低嘅巴塞教练，仲衰过朗奴高文(58.21%)。沙维赛後解释：「我理解大家失望，球迷嘅期望好高，因为呢个原因，我认为球队有啲紧张，我尝试同球员讲所有压力都喺教练身上，华历简奴战术好成功，入唔到波好遗憾，我哋要继续成长。」