曼联30年来首次喺英超排包尾！周日(14日)凌晨英超大战，曼联作客惨吞宾福特4蛋，开季连输2场後喺联赛榜垫底，新帅坦哈格更成为101年来首个执教头2场输晒曼联教头，前景相当恶劣。坦哈格赛後亦发火炮轰球员踢得「垃圾」，直指球队需要引入更多高质素球员。

曼联首战主场1比2输畀白礼顿，今仗面对宾福特更兵败如山倒，门将迪基亚早段连环送礼，先系接波甩手畀祖殊达施华射门漏入，18分钟再交医院波累队友被逼甩，马菲亚斯赞助轻松射成2比0。宾福特喺30同35分钟再由宾美同麦比奥莫建功，半场领先4球并维持到完场。

开咧连输2场兼得失球负5，令曼联自1992年後首次再尝包尾滋味，当年「红魔鬼」头2仗输畀锡菲联(1比2)同爱华顿(0比3)後垫底，第3轮打和叶士域治先抢到第1分，估唔到曼联之後愈踢愈好，最後神奇拎到联赛冠军。不过曼联依家情况立立乱，第3轮仲要迎战冠军热门利物浦，抢分难度极高。

备受压力嘅坦哈格，成为1921年嘅约翰卓文後，第1个执教头2场正式比赛输晒嘅曼联主帅，佢赛後亦大发牢骚：「真系好垃圾，我哋需要更高嘅水平，球队好明显要改变，35分钟输4球系冇可能发生嘅事，我为球迷觉得难过，我哋令到佢哋失望。领队要负最大责任，嗰个就系我，曼联需要有质素嘅新球员，我哋正尽努力游说佢哋加盟。」