周五(19日)凌晨欧协联附加赛首回合，英超球会韦斯咸主场3比1击败域堡，一洗联赛2连败颓风，今夏加盟嘅意大利前锋施卡马卡，首次正选上阵即有入波，一众新兵有望帮球队重返正轨。

韦斯咸英超开咧连输2场後，今仗强阵出击兼有唔少新兵登场，意大利前锋施卡马卡23分钟接应传中顶入，拎到佢加盟後第1个入球，助攻嘅哥尼特同样系首度正选披甲。韦斯咸下半场由查洛保云射成2比0，域堡之後成功破蛋，但米查利安东尼奥78分钟再为韦斯咸拉开到3比1。加盟唔够48小时嘅德国守将泰路基拿，下半场亦有份上阵，韦斯咸周日(21日)对白礼顿或有全新阵容。

今场代替停赛莫耶斯领军嘅比利麦坚尼，赛後表示满意球员表现：「好开心施卡马卡入到第1球，哥尼特嘅功劳都好大，佢哋第1场正选就有好表现，可以增强信心同减少压力，我哋知道呢班球员仲可以有更加好嘅演出。」