周二(23日)凌晨英超「双红会」，曼联变阵出击赢出漂亮一仗，领队坦哈格大胆收起C朗拿度同哈利马古尼2大球星，结果「红魔鬼」反而踢出活力，成功以2比1击退利物浦，拎到今季以及坦哈格上任後首胜；至於输波嘅利物浦就3战不胜，3轮联赛过後已落後曼城5分。

开季2连败嘅曼联今仗改变策略，拉舒福特取代C朗拿度担正箭头，队长哈利马古尼亦被华拉尼取代，变阵後果然脱胎换骨，艾兰加早段已有射门中柱，呢位小将16分钟再送助攻，查顿辛祖禁区内冷静避过占士米拿飞铲後射入，半场曼联领先1比0。

表现活跃嘅艾兰加半场因伤退下火线，但坦哈格换入嘅系安东尼马迪尔而唔系C朗，53分钟安东尼马迪尔助攻拉舒福特单刀射成2比0，81分钟穆罕默德沙拿为利物浦追番1球，可惜为时已晚，C朗去到完场前4分钟先有机会落场「郁下」，最终曼联赢2比1全取3分。

坦哈格今场变阵大成功，拉舒福特打破7个月(17场)入球荒，令C朗被贬後备嘅决定变得「合理」；华拉尼同利辛度马天尼利嘅中坚组合，分别录得全场最高嘅9次解围同3次封阻，成功抵御利物浦进袭，令哈利马古尼安心坐冷板。曼联赢波後3战得3分，排名比3战得2分嘅利物浦更高，危机暂时得以解除。