热刺开季3胜1和位居英超前列，成绩令人满意，不过上季英超神射手孙兴民4轮过後仍然食白果，就有啲唔开心，对诺定咸森林下半场被换出嗰阵，镜头见到一向温文儒雅嘅佢发晒脾气，更估唔到嘅系，领队干地竟然咁样安慰佢。

干地赛後讲到孙兴民今季表现，佢咁样讲：「Sonny系一位好懂事嘅球员，佢为人非常好，如果我要帮女儿搵老公，我会搵一个好似佢咁嘅人。」

佢仲话好明白孙兴民嘅心情：「喺现时呢个阶段，佢可能因为冇波入而感到痛苦，但佢一定要相信自己，保持冷静，我哋亦好信任佢，佢冇入波其实冇咩大问题，佢一直喺我计划当中。」

其实干地要招孙兴民做女婿唔系冇可能，不过要等多几年，因为干地个女Vittoria Conte只得14岁，仲读紧高中，等到佢成年，而孙兴民仲系单身至讲啦。