曼联早前以7,000万镑收购卡斯米路，曼联官方社交网亦不断出贴为呢位球星造势，不过其中一段卡斯米路亮相奥脱福影片就引起争议，球迷发现曼联将背景嘅「反格拉沙」歌曲，换成高呼「曼联、曼联」嘅打气声。

曼联喺主场对利物浦开波前，卡斯米路首度喺奥脱福球场亮相，不过当时场内正进行抗议活动，全场球迷高唱「我哋要格拉沙滚蛋」歌曲。但系曼联官方公布嘅亮相影片，竟然「配上」球迷高叫「曼联、曼联、曼联....」嘅打气声，有现场球迷拎出当日嘅影片做证，踢爆曼联「河蟹」嘅古惑行为。

事後大批网民喺曼联官方twitter留言炮轰：「曼联真系觉得球迷会唔知，好可怜」、「真系不知廉耻，但系曼联咁做唔会令我觉得奇怪」、「真系好X尴尬」。