周一(29日)凌晨西甲大战，巴塞隆拿主场4比0大破华拉度列，今夏加盟嘅罗拔利云度夫斯基「上晒力」，连续第2场联赛梅开二度，今仗佢更有一记超级巧妙嘅「後脚拉西」入波，技惊四座！

巴塞今场占压倒性优势，早段2次攻门中柱唔入後，24分钟「罗拔仔」终於打开纪录，完半场前柏迪再入1球；64分钟「罗拔仔」接应奥士文尼迪比利传送，禁区内被对手紧逼之下，突然用高难度「後脚拉西」射门，华拉度列门将同守衞完全冇反应，眼光光望住个波碌入龙门。巴塞最後喺补时阶段由沙治罗拔图「埋斋」赢4比0。

巴塞教练沙维赛後大赞「罗拔仔」：「拥有罗拔利云度夫斯基系一种恩赐，佢把握机会能力好强，除咗入波之外，球迷未必留意到，佢冇波在脚一样非常出色，系天生嘅领袖。」西甲对上一个喺登陆西甲头3轮就2次梅开二度嘅球员，已经要数到2011年马体会嘅法卡奥。