今夏重返祖云达斯嘅法国中场保罗普巴，惊爆兄弟反目闹剧，哥哥马特斯普巴周日(28日)喺社交网拍片宣布，即将揭露细佬保罗普巴「爆炸性」嘅黑历史，内容疑牵涉另一法国巨星基利安麦巴比。保罗普巴随後发声明反击，报称被持枪匪徒禁锢兼勒索1,100万镑，依家已经报警，马特斯普巴同另外2名朋友正被调查。

保罗同马特斯一向感情要好，今次突然反目令球迷震惊。马特斯周日喺新开设嘅twitter公布影片，预告即将爆保罗普巴大镬：「法国、英国、意大利同西班牙嘅民众，即系全世界，尤其系保罗普巴嘅球迷、队友、赞助商，你哋有权知道一啲事，知道呢个人值唔值受到尊敬、信任......我有好多证据去证明自己嘅说话，我嘅爆料会非常轰动同具爆炸性。」

保罗普巴妈妈兼经理人Yeo Moriba立即发声明回应，直指马特斯联同其他匪徒企图勒索保罗普巴。法国各大媒体报道，保罗普巴已向警方报案，称喺近4个月一直受到一班「儿时好友」勒索，要求交出1,100万镑「保护费」，今年3月更被胁持去巴黎郊区一个单位禁锢，其中2人更加拎住步枪。

消息指保罗普巴所指嘅「儿时好友」，包括哥哥马特斯同另外2名朋友，疑犯不满保罗普巴成名後未有提供经济援助，报道更指今年1月嗰阵，有人喺保罗巴普嘅曼彻斯特寓所内，盗用呢位法国国脚嘅信用卡，令佢损失13万镑，结果被保罗普巴赶走。

保罗普巴报警後，马特斯周一(29日)凌晨再喺twitter反击：「哈哈哈！保罗普巴终於露出本性，佢向警方讲大话，你(保罗)真系好想送我入监狱、阻止我爆大镬......我几乎因为保罗普巴而冇命，真相揭露前你可以继续扮无辜。基利安(麦巴比)，你依家知道未？我对你(麦巴比)冇任何不满，我讲嘅都系为你好，个巫师都知道。」传闻指保罗普巴其中一个「黑幕」，系曾经请巫师向队友基利安麦巴比落降头。

现年32岁嘅马特斯普巴亦系职业球员，曾喺英国效力域斯咸、克鲁等低组别球队，今年约满贝尔福後未有再落班。马特斯同保罗一直关系好好，上年欧国盃期间佢亦入场睇足法国所有赛事，而且喺贵宾厢入面好受法国国脚嘅家人欢迎，今年3月马特斯曾经搞一个慈善活动，保罗普巴亦有出席兼系最大捐款者，意味两兄弟反目系最近先发生嘅事。