西甲球队毕尔包正式宣布，向巴黎圣日耳门(PSG)借用咗中场安达靴里拉，为期1季，明夏有权买断呢位33岁老将。安达靴里拉为免再返去PSG受罪，势必搏命交出表现，希望毕尔包明年真系买断佢。

安达靴里拉对於毕尔包并唔陌生，因为佢曾於2011至14年效力呢支西甲球队3季，并打出名堂，其後转投曼联，3年前以自由身加盟PSG，但不受重用，上季仅上阵1,602分钟，射入4球及2次助攻。

早前传出PSG要求安达靴里拉解约，否则将佢贬落B队，踢第5级别联赛。不过，双方最终并冇解约，PSG决定将安达靴里拉外借去毕尔包。

安达靴里拉已经喺毕尔包主场亮相，同球迷见面，预料有望出战周日(9月4日)晚西甲主场对爱斯宾奴。