今晚英超中下游对决，阿士东维拉主场迎战「圣人」修咸顿。维拉开咧战绩欠佳，自知防守不稳，近期比赛初段踢得特别保守；「圣人」作客出击亦唔敢冒进，半场和有追捧价值。

（Now 621周六凌晨3时直播）

维拉今夏不断买人，可惜表现不似预期，连同盃赛在内，开季头7仗只得2胜2和3负，单计联赛赢得1场咁大把，最大镬系呢7仗场场有失波，包括英联盃对保顿先失波下反胜4比1。查实主帅谢拉特有苦自己知，新加盟嘅中坚迪亚高卡路士重伤要抖到下年，焗用今季被「搣柴」嘅前队长泰朗明斯，难怪防线表现甩甩漏漏，加上右闸马迪卡殊都伤埋，要用老将艾舒利杨格顶住先，为抢分惟有稳阵行先，初段唔介意同对手斗磨，上仗打和劲旅曼城1比1，有办你睇。

修咸顿今季曾反胜车路士2比1，排名亦较维拉高，但实际上只系多对手3分。睇番佢哋近3仗联赛作客，只得1胜2负，唯一胜仗系击败沉到冇朋友嘅李斯特城，不足为据，今晚作客维拉唔慌踢得咁进取。翻查纪录，维拉近5仗有4次上半场同对手打和，预料初段会先求唔输，易边後再睇准机会反击，半场和有计。